Polizei Bayern » PP München » Aktuelles » Presse » Neueste Pressemeldungen

21.02.2016, PP München


Pressebericht vom 21.02.2016 - Bayrisch


335. A PKW fahrt a Fußgängerin å – da Fahrer haut åb! --Neuperlach
Am Freitag, 19.02.2016, ummara neune auf d Nacht is a Autofahrer, den bisher koaner kennt, auf da Thomas-Dehler-Straße in Richtung Norden gfahrn. Agratt zur gleichn Zeit woillt a 14 Jahr oids Schuideandl bei da Thomas-Dehler-Straße vom Hans-Seidl-Platz her über d Straß geh.
Sie is direkt hinter am Linienbus, der gråd vorbeigfahrn is, auf d Straß ganga und håd dabei ned auf de andern Autos aufpasst. In dem Moment hat des Deandl a Auto ågfahrn. Da Fahrer is oafach weidagfahrn, ohne dass er se um des Madl bekümmert hätt. De 14-jährige is leicht verletzt wordn (a Hüftprellung auf da rechtn Seitn); sie habms ins nächste Krankenhaus zur ambulanten Behandlung gfahrn.
Da Verkehr had in dera Zeit, wo da Unfall aufgnomma wordn is, ohne Unterbrechung weidafahrn kenna.

Zeugenaufruf:
Alle Leut, de ebbs gsehgn habm, dees da Polizei weidahelft, dass ma woaß, wia dees oiss herganga is, soill beim Unfallkommando, Tegernseer Landstraße 210, 81549 München, Tel.: 089/6216-3322, åruafa, hischreibm oder vorbeikemma.


336. Autoteile abmontiert – vier Rumänen festgnomma -- Untergiesing
Am Donnerstag, den 18.02.2016, ummara hoibeelfe auf d Nacht had a 55 Jahr oide Münchnerin vier Leut bei a r am Wohnmobil gsehgn, dees unter da Candidbruckn pàrkt gween war. De Viere san ihr komisch vorkemma: 3 davo habm nämlich ganz auffällig „passt“, dawei is da Vierte unter s Wohnmobil krabbelt, had dort a Zeitl umanandagwerkt und is wieder aussakemma.
De Frau dees sehgn und Polizei åruaffa war oans. De Polizistn von da Polizeiinspektion 23 warn àà glei då und habm in da Näh in a r am rumänischn Tranporter vier verdächtige Personen vorgfundn.
Na habm se de Polizistn zerscht amoi des Wohnmobil genauer ågschaugt – habm àà unt einegschaugt (weil de Frau dees ja gsehgn ghabt hat, wia oane vo de Viere druntergflackt is) und siehe da: Anlasser ausbaut!
Da danach habm s na de Ladung vom Transporter unter d Lupn gnumma und pfeigrad den Anlasser wieder gfundn!
Alle Viere (22, 24, 32 und 38 Jahr alte Rumänen) hat na Polizei vorläufig festgnumma und auf d Wach von da PI 23 bråcht. Personalien aufnehma und de Viere – weil ohne festen Wohnsitz – ins Gfängnis vom Präsidium bringa war dees oane; da Staatsanwalt im Polizeipräsidium had na àà glei Untersuchungshaft beantragt. De Vernehmungen warn dees ander: alle mitnand habm s zuagebn, dass gstohln habm.



337. A bsonders schwààra Fall vo Diebstahl aus a r a Bäckerei; zwoa Leut verhaft – Waldtrudering
Am Freitag, den 19.02.2016, a Viertelstund nach Mitternacht war s scho, da habm – zu dera Zeit hellwache – Zivilbeamte vo da Münchner Polizei zwee Einbrecher in der Schwablhofstraß festgnomma. De Zwee warn grad damit beschäftigt, dass an Tresor aus a r a Bäckerei ausse tragn. Vor lauter schwààr hebm habms gar ned gspannt, dass eahna de Polizistn zuschaugn. De Zivilen habm dee Diab, beide Münchner, 29 und 34 Jahr alt, àà glei festgnumma.
Bei da anschließenden Vernehmung hat da oa àà glei oiss zuagstandn, bloß da ander hat a s Mäui ned aufbracht. D Polizei had na sofort de Wohnungen vo de Zwee durchsuacht und bei an jedm a wengerl a Marihuana gfundn. Sie san dann no – wia s im Polizeideutsch hoaßt – „erkennungsdienstlich behandelt“ wordn (Buidl, Fingerabdrück usw.), a DNA-Prob habm s àà abgebm miassn. Da zuaständige Staatsanwalt had na gsagt, dass jetz hoamgeh kànntn, weil’s an festn Wohnsitz habm und bisher strafrechtlich no ned aufgfoin san.


338. A ganz a bsondere Kontrollaktion in da Schillerstraß – Ludwigvorstadt
D Münchner Polizei had Wind davo kriagt, dass in a r a Boazn znachst m Hauptbahnhof verbotene Prostitution ned bloß eigfadlt, sondern àà do weard. Nebmbei is da Polizei bekannt worrn, dass in dem Lokal Rauschgift eignumma, und àà verkafft wearn soi. Es is na aussakemma, dass dees Nachtlokal bloß vo Leut aus m arabischen und nordafrikanischen Raum bsuacht wird, aber ned bloß dees: De Betreiber kemman àà vo då.
In da Nacht vo Freitag auf Samstag (19.02. / 20.02.2016) is deszweng auf Anregung vom Kommissariat 35 (dee san zuaständig für d Prostitution) a ganz krawottische Kontrolle in dem Lokal in da Schillerstraße gmacht wordn. Da war ned bloß d Münchner Polizei da; Bereitschaftspolizei had mit Einheiten dazuaghoiffa und as Hauptzollamt München war àà dabei (de san zuständig für oiss, was mit Schwarzarbeit, Mindestlohn und am Jugendschutz zsammhängt). Ummara 80 Leut warn in dem Lokal und san kontrolliert wordn. 24 Weiberleut san verdächtig, dass dem – in dem Gebiet verbotenen – „horizontalen Gewerbe“ nachgengan. Bei oam Mannsbuild is ziemlich sicher, dass er da Zuahälta vo deene Weiberleut is. Da arbat aber jetz as Kommissariat 35 weida drå. Vier Leut san festgnomma wordn, weil s „Stoff“ dabei ghabt habm. A Briafal Koks, Marihuana in a r a Alufolie und Haschischbröckerl san gfundn wordn. Da Zoll war in seinm Aufgabengebiet àà erfolgreich: der hat a Packl Ordnungswidrigkeiten-Verfahren auf n Weg bråcht. Da Betreiber vo dera Lokalität weard a Buaßgeld vo mehrare 10.000.- Euro blecha miassn.
In da ganzn Zeit vo dem Einsatz war d Schillerstraß gschperrt.

© Bayerische Polizei Nach oben Diese Seite ausdrucken Diese Seite den Favoriten hinzufügen

Pressemeldungen


Fahndungen


Veranstaltungen




Regionale Polizeiverbände

Überregionale Verbände

Polizei Bayern - Der Garant für Ihre Sicherheit.
Zur Startseite Zum Bayerischen Staatsministerium des Innern